Thursday, October 22

कोरोना ‘पोजिटिभ’ तीन प्रहरीसहित ६ जना

July 22, 2020 166

स्याङ्जा : स्याङजामा मंगलबार ६ जनामा कोरोना पुष्टि भएको छ। जिल्ला प्रहरी कार्यालय स्याङजामा कार्यरत ३ जना प्रहरी र फेदिखोला गाउँपालिकाका–३ पुरुषमा कोरोना संक्रमण पुष्टि भएको हो।

पुतली बजारका ३३, ३४, ३८ वर्ष र फेदिखोलाका ३१, ५५ र ५८ वर्षका पुरुषमा कोरोना संक्रमण पुष्टि भएको प्रादेशिक कार्यालय पोखराका स्वास्थ्य निर्देशक बिनोदबिन्दु शर्माले जानकारी दिए।

एक प्रहरी हवल्दारसहित २ जना प्रहरी जवानमा कोरोना संक्रमण पुष्टि भएको पुतली बजार नगर स्वास्थ्य शाखा प्रमुख विष्णु काफ्लेले जानकारी दिए। ‘प्रहरीमा रुघाखोकी र ज्वरोको संक्रमणदेखेपछि प्रहरी प्रमुखको आग्रहमा पीसीआर परीक्षण गरेका थियौं ’ उनले भने, ‘थप अरु प्रहरीको पनि पीसीआर परिक्षण गर्ने तयारीमा छौं।’

यसैगरी, फेदिखोलाका युवा भने भारतबाट आएर क्वारेन्टाइनमा बसेका र उनीहरुको ४ गते पीसीआर रिपोर्ट पठाएको पालिकाका अध्यक्ष घनश्याम सुवेदीले जानकारी दिए।
पुतलीबजारका संक्रमितलाई करेन्डाँडा स्वास्थ्य केन्द्र र फेदिखोलाका संक्रमितलाई भाटखोला स्वास्थ्य चौकीमा बनाइएको आइसोलेसनमा राखिएको छ।

योसँगै स्याङ्जामा कोरोना संक्रमितको संख्या २ सय ४ पुगेको छ। अहिलेसम्म १ सय ८५ जना कोरोना निको भएर घर फर्केका छन् भने १९ जना विभिन्न आइसोलेसनमा उपचाररत छन्। २ जना संक्रमितको भने मृत्यु भएको जिल्ला स्वास्थ्य प्रमुख यामप्रसाद शर्माले जानकारी दिए।

स्वास्थ्य कार्यालयका अनुसार अब कालिका सामुदायिक अस्पतालमा ५ जना, कुँवर समाजघरमा ५ जना, करेन्डाँडामा ४, भाटखोलामा ३, चापाकोटमा १ , गल्याङ्मा १ जना संक्रमित उपचाररत छन्।

Source Annapurna Post

प्रतिकृया दिनुहोस्